Luk 5:27-39 | YomNWM | STEP | Mambu momo bu mavioka, Yesu wuyenda kuandi. Vayi wumona mfutisi wumosi wu ziphaku mu nzila, buna kavuendi mu bilu kimfutusulungu ziphaku, dizina diandi Levi. Buna wuntela ayi wunkamba :

Luke 5:27-39

Bafindisa Yesu ziphaka

(Matayi 9.9-13 ; Malako 2.13-17)

27 Mambu momo bu mavioka, Yesu wuyenda kuandi. Vayi wumona mfutisi wumosi wu ziphaku mu nzila, buna kavuendi mu bilu kimfutusulungu ziphaku, dizina diandi Levi. Buna wuntela ayi wunkamba :

—Wundandakana.

28 Mutu beni wutelama, wubika bima bioso ayi wulandakana Yesu. 29 Buna Levi wukubikila Yesu ndikulu dinneni, ku nzoꞌandi. Batu bawombo baba yawu va meza. Mu bawu muba mimfutisi mi ziphaku.

30 Bafalisi ayi minlongi mi mina miomi miba mu dingumba diawu mifuema ayi bayuvula minlonguki mi Yesu ti :

—Bila mbi lulembo dila ayi nuina va kimosi ayi mimfutisi mi ziphaku miomi, bankua masumu e ?

31 Yesu wuba vutudila :

—Batu bobo badi nitu yi buvini batombanga munganga ko. Vayi batu badi bimbevo bawu bantombanga munganga. 32 Ndisia kuiza tela batu basonga ko vayi ndiyiza mu diambu di tela bankua masumu.

Kimona ayi kikhula

(Matayi 9.14-17 ; Malako 2.18-22)

33 Buna bankaka banyuvula :

—Bila mbi minlonguki mi Yowani ayi mi Bafalisi mikukifuisanganzala mu diambu di lusambulu vayi miaku mindia ayi minua e ?

34 Yesu wuba vutudila :

—A beno lumbanza ti batu bobo batumusu, kuidi ditoko diodi dikuedidi, balenda kukifuisa nzala mu diambu di lusambulu ditoko dikuedidi bu dikidi yawu va kimosi e ? 35 Vayi vadi thangu bu bela ku babotula ditoko, buna bosi mu bilumbu binabela kukifuisa nzala mu diambu di lusambulu.

36 Buna wuba kamba nongo yimosi :

—Mutu kalendi ko kanzuna tendi kinledi wumona muingi kalondila nledi wunkhulu. Bila buna maka kanzuna nledi wumona ayi tendi kioki kabongidi mu nledi wumona kilendi fuanakana ko ayi tendi kikhulu. 37 Bobuawu, mutu kalendi tula ko vinu kimona mu zitsaku zikhulu ^{▼▼Bayuda baba kifu kilundilanga vinu mu zitsaku zivangulu mu minkanda mi bibulu, vayi mu nkanda wu khombo ziba luta vangiminanga. Tala Matayi 9.17.} bilanganu vinu kimona kilenda kanzuna zitsaku zikhulu. Buna vinu kidukukidi ayi zitsaku zifuidi. 38 Vayi bufueni mu tula vinu kimona mu zitsaku zimona. 39 Kuisi ko mutu wunua vinu kikhulu wubuela tomba diaka nua vinu kimona bila kafueti tuba : vinu kikhulu kilutidi lueki !